តួកគី៖ មនុស្សយ៉ាងហោចណាស់ ១ ៥០០នាក់ត្រូវបានសម្លាប់បន្ទាប់ពីការរញ្ជួយដីដ៏ខ្លាំងចំនួនពីរបានវាយប្រហារប្រទេសទួរគី និងស៊ីរីក្នុងរយៈពេល ១២ ម៉ោង។

យោងតាមការចុះផ្សាយរបស់សារព័ត៌មាន The Guardien ចំនួនអ្នកស្លាប់ត្រូវបានគេរំពឹងថានឹងកើនឡើង ដោយប្រតិបត្តិការស្វែងរក និងជួយសង្គ្រោះកំពុងដំណើរការនៅទូទាំងតំបន់ ខណៈដែលអគារជាច្រើនបានដួលរលំ ហើយត្រូវបានគេគិតថាមានមនុស្សជាច្រើនបានជាប់នៅក្នុងគំនរបាក់បែក។

សារព័ត៌មាននេះបានផ្សាយថា៖ «តួលេខផ្លូវការពីប្រទេសតួកគី និយាយថាមនុស្ស ១ ០១៤នាក់បានស្លាប់នៅទីនោះ ៥ ៣៥៣នាក់ រងរបួស និង ២ ៨១៨ អគារបានដួលរលំ។ ក្រសួងសុខាភិបាលស៊ីរីបាននិយាយថាមនុស្សជាង ៣២៦នាក់ត្រូវបានសម្លាប់និង ១ ០៤២នាក់ បានរងរបួស»។

បន្ថែមពីលើតួលេខទាំងនោះ សេវាសង្គ្រោះមួកសុវត្ថិភាពស នៅភាគពាយព្យនៃប្រទេសស៊ីរី នៅក្នុងតំបន់ដែលមិនត្រូវបានគ្រប់គ្រងដោយរដ្ឋាភិបាល បានដាក់ចំនួនអ្នកស្លាប់ចំនួន ២២១នាក់ ដែលផ្តល់ឱ្យអ្នកស្លាប់សរុបចំនួន ១ ៥៦១នាក់។

ក្រុមរុករក និងជួយសង្គ្រោះជាង ១០ក្រុមមកពីសហភាពអឺរ៉ុបត្រូវបានចល័តបន្ទាប់ពីមានការរញ្ជួយដីដ៏ធំដែលបានវាយប្រហារប្រទេសទួរគី នេះបើតាមអ្នកនាំពាក្យរបស់គណៈកម្មការអឺរ៉ុប។

សហរដ្ឋអាមេរិក ចក្រភពអង់គ្លេស អ៊ីស្រាអែល រុស្ស៊ី និងចិន ស្ថិតក្នុងចំណោមប្រទេសដទៃទៀត ដែលបានផ្តល់ជំនួយជាសាធារណៈ។

ការរញ្ជួយដីលើកដំបូងបានវាយប្រហារនៅពេលដែលមនុស្សដេកលក់ ហើយវាស់កម្រិត ៧.៩រ៉ិចទ័រ ដែលជាការរញ្ជួយដ៏ខ្លាំងបំផុតមួយនៅក្នុងតំបន់ក្នុងរយៈពេលយ៉ាងហោចណាស់មួយសតវត្ស៕